મોરબી જિલ્લાના ખેડૂતોને પાણીના ટાંકા બનાવવા તેમજ સ્માર્ટફોનની ખરીદી પર સહાય મેળવવા માટે આઇ ખેડુત પોર્ટલ ખુલ્લુ મુકાયું
યોજનાનો લાભ લેવા માટે www.ikhedut.gujarat.gov.in પોર્ટલ પર અરજી કરવી
મોરબી જિલ્લાના ખેડુતોને ખેતીવાડી વિભાગની વિવિધ સહાય યોજનાઓના લાભ ઘરઆંગણે સરળતાથી ઉપલબ્ધ થાય તેવા શુભ આશય સાથે www.ikhedut.gujarat.gov.in પોર્ટલ તૈયાર કરવામાં આવેલ છે. આ પોર્ટલ મારફતે વર્ષ ૨૦૨૩-૨૪ માટે સહાય અરજીઓ મેળવવાની થાય છે. રાજ્યના ખેડુતોને ખેતીવાડી ખાતાની પાણીના ટાંકા બનાવવા સહાય અને સ્માર્ટફોનની ખરીદી પર સહાય યોજનાનો મહત્તમ લાભ મળી રહે તેવા આશયથી રાજ્ય સરકારે સને ૨૦૨૩-૨૪ માટે આઇ ખેડુત પોર્ટલ હાલ ખુલ્લુ મૂકવામાં આવ્યું છે જેના પર ખેડુતો ઓનલાઇન અરજી કરી શકશે.
આ વર્ષે અરજીઓ મેળવવા બાબતે સુધારો કરી લક્ષ્યાંકની ૧૧૦% મર્યાદામાં અરજીઓ ઓનલાઇન થાય તે મુજબ નક્કી થયેલ છે. જેને ધ્યાને લઇ રાજ્યના તમામ ખેડુતોને આ ઘટકોમાં સહાય મેળવવા માટે વહેલા તે પહેલાના ધોરણે ઓનલાઇન અરજી કરી, અરજીની નકલ પોતાની પાસે રાખવાની થાય છે. પૂર્વ મંજુરી મળ્યેથી અરજીની નકલ સાથે જરૂરી સાધનિક દસ્તાવેજ સબંધિત કચેરીએ મોકલવાના રહેશે.
વધુમાં અન્ય ખેતીવાડીની સહાયકારી યોજનાઓના ઘટકો માટે સમયાંતરે સરકારશ્રી માંથી વહીવટી મંજૂરી મળ્યેથી આઇ ખેડૂત પોર્ટલ પર અરજી કરવા માટે પોર્ટલ ખોલવામાં આવશે. જેની નોંધ લેવા મોરબી જિલ્લાના ખેડૂતમિત્રોને મોરબી જિલ્લા ખેતીવાડી અધિકારી વિક્રમસિંહ ચૌહાણની યાદીમાં જણાવાયું છે.
