અમદાવાદ: દેશના અનેક રાજ્યોમાં ભીષણ ગરમીની વચ્ચે જ ચોમાસાની ધમાકેદાર એન્ટ્રી થઈ રહી છે. હવામાન વિભાગ (IMD) ના જણાવ્યા અનુસાર, દક્ષિણ-પશ્ચિમ ચોમાસું 23 મે 2026 ના રોજ આગળ વધીને અરબી સમુદ્ર, કોમોરિન પ્રદેશ, બંગાળની ખાડી અને આંદામાન સમુદ્રના મોટાભાગના વિસ્તારોને આવરી ચૂક્યું છે.
આગામી 3-4 દિવસમાં ચોમાસું વધુ આગળ વધવા માટે સાનુકૂળ પરિસ્થિતિઓ સર્જાઈ રહી છે, જેના કારણે કેરળ, લક્ષદ્વીપ, તમિલનાડુ અને પૂર્વોત્તર ભારતમાં ભારેથી અતિભારે વરસાદ પડવાની સંભાવના છે. આ બધાની વચ્ચે હવામાન વિભાગે ઉત્તર પ્રદેશ, બિહાર, ઝારખંડ, પંજાબ, હરિયાણા, ઉત્તરાખંડ, આંધ્ર પ્રદેશ અને જમ્મુ-કાશ્મીર સહિત દેશના 19 રાજ્યોમાં તોફાની પવન અને વરસાદનું એલર્ટ જાહેર કર્યું છે. આ દરમિયાન કેટલાક વિસ્તારોમાં 70 કિલોમીટર પ્રતિ કલાકની ઝડપે તેજ પવન ફૂંકાઈ શકે છે અને હળવા કરા પણ પડી શકે છે.
દેશની રાજધાની દિલ્હીમાં હવામાન વિભાગે વરસાદની સાથે હીટવેવનું ડબલ એલર્ટ આપ્યું છે. 24 મેના રોજ આકાશ ચોખ્ખું રહેવાની સાથે કેટલીક જગ્યાએ લૂ ચાલશે, જ્યાં તાપમાન 45 ડિગ્રી સુધી પહોંચી શકે છે અને 40 કિમી પ્રતિ કલાકની ઝડપે પવન ફૂંકાશે. જોકે, 25 મેના રોજ દિલ્હીમાં ગાજવીજ સાથે હળવોથી મધ્યમ વરસાદ અને વાવાઝોડું આવવાની સંભાવના છે, જ્યારે 26 મેના રોજ ફરી લૂની સ્થિતિ યથાવત રહેશે.
બીજી તરફ, ઉત્તર પ્રદેશમાં 24 થી 29 મે સુધી પૂર્વી અને પશ્ચિમી ભાગોમાં લૂ ચાલવાનું એલર્ટ છે, પરંતુ તેની સાથે જ પશ્ચિમ યુપીના મેરઠ, શામલી, બુલંદશહેર અને સહારનપુર સહિત લખનૌ, કાનપુર, પ્રયાગરાજ અને વારાણસી જેવા જિલ્લાઓમાં તેજ પવન સાથે વરસાદની પણ આગાહી કરવામાં આવી છે.
બિહાર અને ઝારખંડમાં પણ આગામી દિવસોમાં વાવાઝોડા સાથે વરસાદી માહોલ જોવા મળશે. બિહારના પટના, ગયા, મુઝફ્ફરપુર અને ભાગલપુરમાં ઉમસભર્યા વાતાવરણ વચ્ચે 24, 28 અને 29 મેના રોજ વરસાદ પડી શકે છે, જેમાં 24 મેના રોજ ભારે વાવાઝોડું અને 25-26 મેના રોજ ભારે વરસાદની આશંકા છે.
ઝારખંડના રાંચી, જમશેદપુર અને ધનબાદમાં 24-25 મે દરમિયાન વાવાઝોડું આવ્યા બાદ 26 થી 29 મે વચ્ચે વરસાદ પડવાની સંભાવના છે. પંજાબમાં હાલ ભીષણ ગરમી અને લૂનો પ્રકોપ 24 થી 29 મે સુધી યથાવત રહેશે, પરંતુ હવામાન વિભાગે 28 અને 29 મેના રોજ તેજ પવન સાથે વરસાદ પડવાની આગાહી કરીને લોકોને થોડી રાહત મળવાના સંકેત આપ્યા છે.
પહાડી રાજ્યોની વાત કરીએ તો ત્યાં પણ કુદરતનો મિજાજ બદલાયો છે. હિમાચલ પ્રદેશના શિમલા, મનાલી, ધર્મશાલા અને ચંબામાં 29 મે સુધી ગાજવીજ અને તેજ પવન સાથે હળવો વરસાદ તેમજ કેટલીક જગ્યાએ કરા પડવાનું એલર્ટ અપાયું છે.
ઉત્તરાખંડના દેહરાદૂન, નૈનીતાલ અને હરિદ્વારમાં હવામાન પલટાશે અને 25 મેના રોજ ગાજવીજ, તેજ પવન સાથે વરસાદ તેમજ કરા પડવાની આશંકા છે. આ ઉપરાંત, જમ્મુ-કાશ્મીરના શ્રીનગર, જમ્મુ અને પહેલગામમાં પણ હવામાન બદલાયેલું રહેશે અને 24 તથા 25 મેના રોજ ગાજવીજ સાથે વરસાદ અને તેજ પવન ફૂંકાવાની પૂરેપૂરી શક્યતા છે.
