મુંબઈના માલાડ (ઈસ્ટ)માં આવેલી ‘ખોટ ડોંગરી SRA સ્કીમ’ સાથે જોડાયેલા એક મોટા રિયલ એસ્ટેટ કૌભાંડમાં સાર્વજનિક રૂપે સૂચિબદ્ધ કંપની ‘બી રાઈટ ગ્રુપ’ અને શાહ હાઉસકોન પ્રાઇવેટ લિમિટેડ (SHPL) ખરાબ રીતે ફસાયેલી જોવા મળી રહી છે. આ મામલે રોકાણકારો સાથે છેતરપિંડી, ભંડોળની ઉચાપત, મની લોન્ડરિંગ અને જનતાને છેતરવાના આરોપ હેઠળ ED અને SEBI માં ફરિયાદ દાખલ કરવામાં આવી છે, જેમાં ₹275 કરોડથી વધુની નાણાકીય ગેરરીતિની આશંકા વ્યક્ત કરવામાં આવી છે.
7 એપ્રિલ 2026 ના રોજ થયેલી આ ફરિયાદ રાની સતી માર્ગ પર આશરે 5,600 ચોરસ મીટરમાં ફેલાયેલી એસઆરએ (SRA) યોજના હેઠળના પુનર્વિકાસ પ્રોજેક્ટ સાથે સંબંધિત છે. આ ફરિયાદમાં શાહ હાઉસકોન પ્રાઇવેટ લિમિટેડ, બી રાઈટ રિયલ એસ્ટેટ લિમિટેડ, બી રાઈટના પ્રમોટર સંજય એન. શાહ, શાહ હાઉસકોનના મનસુખ શાહ અને આકાશ શાહ, તેમજ રોયલ રિયલ્ટર્સ લેન્ડમાર્ક પ્રાઇવેટ લિમિટેડના પ્રેમજી શાહના નામનો ઉલ્લેખ છે.
અહીં વીડિયો જુઓ: Gondal માં મતગણતરીમાં ગડબડ? ચૂંટણી પંચના અધિકારીનો ઓડિયો વાયરલ
ફરિયાદ મુજબ, ખોટ ડોંગરી એસઆરએ પ્રોજેક્ટના ડેવલપર તરીકે શાહ હાઉસકોન પ્રાઇવેટ લિમિટેડ દ્વારા છેલ્લા કેટલાક વર્ષોમાં વિવિધ પક્ષો સાથે અનેક સમજૂતી પત્રો (MoU) અને વિકાસ કરારો કરવામાં આવ્યા હતા. આરોપ છે કે આ કરારો પ્રોજેક્ટ પર અગાઉથી લેવાયેલી લોન (Mortgage), બોજો અને પેન્ડિંગ વિવાદો છુપાવીને કરવામાં આવ્યા હતા. એસઆરએની સાર્વજનિક માહિતી મુજબ, શાહ હાઉસકોન ડેવલપર છે અને વિશ્વાસ સતોદિયા આર્કિટેક્ટ છે. શાહ હાઉસકોને પ્રોજેક્ટના વેચાણ ઘટકને ગિરવી રાખીને ઈન્ડિયાબુલ્સ/ARCIL જેવી નાણાકીય સંસ્થાઓ પાસેથી અંદાજે ₹104 કરોડ એકત્ર કર્યા હતા, તેમ છતાં અન્ય રોકાણકારો અને ડેવલપર્સ પાસેથી નાણાં લેવાનું ચાલુ રાખ્યું હતું, જેના કારણે એક જ પ્રોજેક્ટ પર અનેક લોકોના નાણાકીય દાવાઓ ઊભા થયા છે.
વધુમાં એવો આક્ષેપ છે કે બી રાઈટ ગ્રુપે 2019 થી 2024 દરમિયાન શાહ હાઉસકોન સાથે શંકાસ્પદ નાણાકીય વ્યવહારો કર્યા હતા. આ પ્રોજેક્ટમાં રોકવામાં આવેલા નાણાંનો એક હિસ્સો કથિત રીતે બી રાઈટ ગ્રુપ સાથે જોડાયેલી સંસ્થાઓ જેવી કે ‘કન્સલ્ટશાહ ફાઇનાન્સિયલ સર્વિસીસ’ અને ‘સ્કાયલાઇન કાઉન્સેલિંગ’ માં પરત મોકલવામાં આવ્યો હતો. આ મામલો પોલીસ સુધી પણ પહોંચ્યો છે. ફેબ્રુઆરી 2026 માં મનસુખ શાહ અને આકાશ શાહ સામે અન્ય એક ડેવલપર સાથે ₹5.15 કરોડની છેતરપિંડીનો કેસ કસ્તુરબા માર્ગ પોલીસ સ્ટેશનમાં નોંધાયો હતો, જે બાદમાં આર્થિક ગુના શાખા (EOW) ને સોંપવામાં આવ્યો છે.
અહીં વીડિયો જુઓ: Borsad માં કોંગ્રેસનો ગઢ છતાં પાર્ટીને એકપણ ઉમેદવાર કેમ ન મળ્યા?
આ કૌભાંડની સૌથી ગંભીર અસર ઝૂંપડપટ્ટીના રહેવાસીઓ પર પડી છે. આરોપ છે કે કરોડો રૂપિયા ઉઘરાવવા છતાં પ્રોજેક્ટ આગળ વધ્યો નથી અને પાત્ર રહેવાસીઓને વર્ષોથી મકાનો કે ભાડાનું વળતર મળ્યું નથી. તપાસમાં એવું પણ બહાર આવ્યું છે કે પુનર્વસન સંકુલ પર અનધિકૃત વ્યક્તિઓનો ગેરકાયદે કબજો છે, જેઓ પાસેથી આરોપીઓ ગેરકાયદે ભાડું વસૂલતા હતા. આ મામલે આરોપીઓએ ધરપકડથી બચવા માટે કરેલી અગાઉથી જામીન અરજીને દિંડોશી સત્ર અદાલતે ફગાવી દીધી છે, જ્યારે અગાઉ આરોપીઓએ હાઈકોર્ટમાંથી તેમની અરજી પાછી ખેંચી લીધી હતી. સૂત્રોનું કહેવું છે કે બી રાઈટ ગ્રુપ અને શાહ હાઉસકોનને એક રાજકીય પક્ષનું પીઠબળ હોવાને કારણે અત્યાર સુધી કોઈ કડક કાર્યવાહી થઈ નથી. ફરિયાદીએ હવે સેબી (SEBI) ને તમામ વ્યવહારોનું ફોરેન્સિક ઓડિટ કરવા અને ફંડના ડાયવર્ઝનને રોકવા માટે વિનંતી કરી છે.