દેશમાં કાર્યરત ઇન્ટરનેટ ગ્રાહકોની સંખ્યા 2025 સુધીમાં 45 ટકા વધીને 90 કરોડ થઈ જશે. ગુરુવારે આઇએએમએઆઈ-કંટર ક્યુબ દ્વારા જાહેર કરાયેલા અહેવાલ મુજબ ગયા વર્ષે દેશમાં આ આંકડો 62.2 કરોડ હતો. ઇનસાઇટ્સ ડિવિઝનના એક્ઝિક્યુટિવ વાઇસ પ્રેસિડેન્ટ વિશ્વપ્રિયા ભટ્ટાચાર્યના જણાવ્યા અનુસાર, આગામી વર્ષોમાં ડિજિટલ ઇકોસિસ્ટમ માટે વોઇસ અને વીડિયો ગેમચેન્જર તરીકે ઉભરી આવશે. રિપોર્ટ અનુસાર શહેરી ભારતમાં ઇન્ટરનેટ એક્સેસ ગ્રામીણ વિસ્તારો કરતાં બમણી હોવા છતાં ગ્રામીણ વિસ્તારોમાં ઇન્ટરનેટ ગ્રાહકોની સંખ્યા વર્ષ દર વર્ષે શહેરી વિસ્તારો કરતાં વધુ છે. 2020માં શહેરોમાં ઇન્ટરનેટ ગ્રાહકોની સંખ્યા 4 ટકા વધીને 32.3 કરોડ થઈ છે, જે શહેરી વસ્તીના 67 ટકા છે, જ્યારે ગામડાઓમાં ઇન્ટરનેટ વપરાશકર્તાઓની સંખ્યા 13 ટકા વધીને 29.9 કરોડ થઈ છે. તે ગ્રામીણ વસ્તીના ૩૧ ટકા છે. કન્સલ્ટિંગ કંપની કંટર સાથે આઇએએમએઆઈના સર્વેક્ષણમાં જાણવા મળ્યું છે કે નાના શહેરોમાં 5 માંથી 2 સક્રિય ગ્રાહકો છે, જ્યારે ટોપ-9 મેટ્રોમાં 33 ટકા સક્રિય ગ્રાહકો છે. રિપોર્ટ અનુસાર 143.3 કરોડ વસ્તીમાંથી 62.2 કરોડ સક્રિય ગ્રાહકો છે, જે કુલ વસ્તીના 43 ટકા છે. રિપોર્ટ અનુસાર, 10 માંથી 9 સક્રિય ગ્રાહકો દરરોજ ઇન્ટરનેટનો ઉપયોગ કરે છે. સરેરાશ સક્રિય ગ્રાહકો દરરોજ ઇન્ટરનેટ પર 1.8 કલાક વિતાવે છે. શહેરી ગ્રાહકો ગ્રામીણ ગ્રાહકો કરતા ઇન્ટરનેટ પર ૧૭ ટકા વધુ સમય વિતાવે છે.
