મોરબી પાલિકા દ્વારા 5.80 કરોડના ખર્ચે 16 રોડના કામનો આજથી પ્રારંભ 

મોરબી શહેરમાં ખાડા ટેકરા અને ધુળની ડમરીઓ ઉડાડતા રસ્તાઓમાથી ટુંક સમયમાં શહેરીજનોને મુક્તિ મળશે. મોરબી નગરપાલિકા દ્વારા છેલ્લા ઘણા સમયથી મંજુર કરવામાં આવેલ વિવિધ 16 રોડ બનાવવાના કામનો આજથી પાલિકા દ્વારા શરુઆત કરવામાં આવશે. સાંજે બે સ્થળોએથી યોજાશે ખાતમુહૂર્ત કાર્યક્રમ.

મોરબી નગરપાલિકા દ્વારા શહેરમાં જુદા જુદા વિસ્તારમાં કુલ રૂ.૫.૮૦ કરોડના ખર્ચે કુલ ૧૬ રોડ મંજૂર કરવામાં આવ્યા હતા. પરંતુ ચોમાસામાં ભારે વરસાદના કારણે રોડનુ ખાતમુહૂર્ત થય શક્યું નહીં અને રોડના કામ શરૂ થઈ શક્યા નહીં. હવે આજથી રોડનું કામ શરું કરવામાં આવશે જેમાં શહેરમાં ૬ જુદીજુદી જગ્યાએ સી.સી.રોડના કામ અને દશ જુદીજુદી જગ્યાએ ડામર રોડના કામનું ખાતમુહૂર્ત કરવામાં આવશે. આજે સાંજે 5 કલાકે આલાપ પાર્ક પાસે કાર્યક્રમ યોજાશે. જેમાં રૂ.3.25 કરોડના ખર્ચે 6 કામોનું ખાતમુહૂર્ત કરવામાં આવશે. જ્યારે રાત્રે 8 કલાકે નહેરુ ગેટ ખાતે કાર્યક્રમ યોજાશે. જેમાં રૂ.2.56 કરોડના ખર્ચે 10 કામોનું ખાતમુહૂર્ત થશે.