“વિદ્યાર્થીઓનું પરિણામ અને સર્વાંગી વિકાસ અંગે ચિંતા અને ચિંતન”
નોર્થ ગુજરાત એજ્યુકેશન સોસાયટી, પાટણ સંચાલિત પી.પી.જી. એક્સપેરિમેન્ટલ હાઇસ્કુલ અને શ્રી વી.આર.પટેલ ઉ.મા. શાળા પાટણ ખાતે ધોરણ 11 વિજ્ઞાન પ્રવાહના વિદ્યાર્થીઓના ઉજ્જવળ ભવિષ્ય અને શૈક્ષણિક પ્રગતિના હેતુથી એક વિશેષ વાલી મીટિંગનું આયોજન કરવામાં આવ્યું હતું. આ મીટિંગનો મુખ્ય સૂર ‘શાળા, શિક્ષક, વિદ્યાર્થી અને વાલી’ના સુમેળ દ્વારા વિદ્યાર્થીનો સર્વાંગી વિકાસ સાધવાનો હતો.
પરિણામોનું ઊંડાણપૂર્વક વિશ્લેષણ:
શાળાના આચાર્ય ડૉ. ઝેડ.એન. સોઢા સાહેબે પ્રથમ અને દ્વિતીય પરીક્ષાના પરિણામોનું તાર્કિક વિશ્લેષણ વાલીઓ સમક્ષ રજૂ કર્યું હતું. તેમણે ખાસ કરીને વિજ્ઞાન પ્રવાહના મુખ્ય વિષયો જેવા કે ભૌતિક વિજ્ઞાન (Physics) અને રસાયણ વિજ્ઞાન (Chemistry) માં વિદ્યાર્થીઓની મહેનત અને પકડ મજબૂત કરવા પર વિશેષ ભાર મૂક્યો હતો. આચાર્યશ્રીએ જણાવ્યું હતું કે માત્ર ગુણ મેળવવા પૂરતું નથી, પરંતુ વિષયનું ઊંડાણપૂર્વકનું જ્ઞાન જ કારકિર્દીના ઘડતરમાં પાયો બને છે.
માનસિક સ્વાસ્થ્ય અને મનોમંથન:
આજના સ્પર્ધાત્મક યુગમાં વિદ્યાર્થીઓના માનસિક સ્વાસ્થ્યની જાળવણી માટે “મનોમંથન” સેશનનું મહત્વ સમજાવતા ડૉ. સોઢાએ વાલીઓને અપીલ કરી હતી કે, તેઓ બાળકની ક્ષમતાને સમજી તેને યોગ્ય પ્રોત્સાહન પૂરું પાડે. વિદ્યાર્થી તણાવમુક્ત રહીને અભ્યાસ કરે તે માટે શાળા અને પરિવાર બંનેએ ચિંતન કરવું અનિવાર્ય છે.
શાળાના સુપરવાઈઝર શ્રી ગમનભાઈ સુથારે વાલીઓને સંબોધતા ‘બાળકના વિકાસના હુંકાર’ વિશે વાત કરી હતી. તેમણે જણાવ્યું હતું કે જ્યારે શાળા અને વાલી એક જ દિશામાં પ્રયત્નશીલ બને ત્યારે જ બાળકનો શ્રેષ્ઠ વિકાસ શક્ય છે.
શિક્ષકો વતી શ્રી ભરતભાઈ રાજન તેમજ વર્ગ શિક્ષકો શ્રી મુળજીભાઈ ચૌધરી અને શ્રીમતી કિન્નરીબેન પટેલ દ્વારા વાલીઓ સાથે સીધો અને પ્રેરણાત્મક સંવાદ સાધવામાં આવ્યો હતો. આ તકે શૈક્ષણિક પાસાઓ સાથે વિદ્યાર્થીઓની વ્યક્તિગત કુશળતા (Soft Skills) ખીલવવા અંગે પણ વિસ્તૃત ચર્ચા કરવામાં આવી હતી.
મીટિંગના અંતિમ ચરણમાં વાલીઓ દ્વારા પૂછવામાં આવેલા વિવિધ પ્રશ્નો અને મુંઝવણોનું શાળા પરિવાર દ્વારા સંતોષકારક અને હકારાત્મક નિરાકરણ લાવવામાં આવ્યું હતું. વાલીઓએ શાળાની આ પહેલને બિરદાવી હતી અને વિશ્વાસ વ્યક્ત કર્યો હતો કે આવા આયોજનથી વિદ્યાર્થીઓના પરિણામમાં ચોક્કસ સુધારો આવશે..
