Borivali Redevelopment Fraud Case : બોરીવલીના શિમ્પોલી વિસ્તારમાં સોસાયટીઓના રીડેલપમેન્ટના બહાને બિલ્ડરો પાસેથી પૈસા ઉઘરાવવા અને છેતરપિંડી કરવાના મામલે દિંડોશી કોર્ટે કડક વલણ અપનાવ્યું છે. કોર્ટે સોમવારે ઋષિકેશ પાર્ક CHS ફેડરેશન લિમિટેડના સેક્રેટરી કેતન નટવરલાલ શાહ અને અન્ય 12 સભ્યોની આગોતરા જામીન અરજી ફગાવી દીધી છે.
શું છે સમગ્ર મામલો?
આરોપીઓ વિરુદ્ધ બોરીવલી પોલીસ સ્ટેશનમાં છેતરપિંડી, વિશ્વાસઘાત અને બનાવટી દસ્તાવેજો બનાવવા અંગે FIR નોંધવામાં આવી છે. આરોપ મુજબ, ફેડરેશનના સભ્યોએ સમાચારપત્રોમાં જાહેરાત આપીને બિલ્ડરોને રિડેવલપમેન્ટ માટે આમંત્રિત કર્યા હતા. જોકે, હકીકત એ હતી કે આ જમીનના ડેવલપમેન્ટ અધિકારો હજુ પણ ‘R K બિલ્ડર્સ’ (મૂળ ડેવલપર) પાસે સુરક્ષિત છે. આ પ્રક્રિયા દરમિયાન આરોપીઓએ 14 ડેવલપર્સ પાસેથી અંદાજે ₹14 લાખની રકમ એકઠી કરી હોવાનું મનાય છે.
આ પણ વાંચોઃ Pabubha Manek ની જાતિવાદી માનસિકતા? દલિતો માટે અપમાનજનક શબ્દનો કર્યો ઉપયોગ
કાયદાકીય વિવાદ અને કોર્ટનું અવલોકન
આ વિવાદ વર્ષ 1980ના વેચાણ કરાર અને પાવર ઓફ એટર્ની સાથે જોડાયેલો છે. ચેરિટી કમિશનરના આદેશ મુજબ, જ્યાં સુધી બિલ્ડર સાતેય ઇમારતોનું કામ પૂરું ન કરે ત્યાં સુધી સોસાયટીઓને પ્રોપર્ટીનું કન્વેયન્સ મળી શકે તેમ નથી.
ફેડરેશન દ્વારા 1,250 ચોરસ મીટરના પ્લોટ પર કબજો મેળવવાનો પ્રયાસ કરવામાં આવ્યો હતો, જ્યાં બિલ્ડિંગ નંબર 4નું બાંધકામ બાકી છે. ડેપ્યુટી રજિસ્ટ્રાર અને અર્બન ડેવલપમેન્ટ ડિપાર્ટમેન્ટે પણ અગાઉ બિલ્ડરની તરફેણમાં નિર્ણયો આપ્યા હતા.
કોર્ટનો ચુકાદો:
જામીન અરજી ફગાવતા દિંડોશી કોર્ટે નોંધ્યું કે: “પ્રાથમિક દ્રષ્ટિએ એવું જણાય છે કે ચેરિટી કમિશનર કે સક્ષમ કોર્ટની પરવાનગી વિના જ આરોપીઓએ અખબારોમાં જાહેરાત આપી અને બિલ્ડરો પાસેથી ₹14 લાખ ઉઘરાવ્યા. આ એક ગંભીર પ્રકારનો આર્થિક ગુનો છે.”
આ પણ વાંચોઃ હેલ્મેટ વગર ઘરેથી બહાર ન નીકળતા, ખિસ્સા થઈ જશે ખાલી! ગુજરાતમાં આજથી હેલ્મેટ ડ્રાઈવ
આરોપીઓ પાસે આ રકમ ઉઘરાવવા માટેના કોઈ કાયદેસરના દસ્તાવેજો ન હોવાથી કોર્ટે તેમને જામીન આપવાનો ઇનકાર કર્યો હતો. આ કેસમાં ભારતીય ન્યાય સંહિતાની કલમ 316(2), 318(4), 336, 340(2) અને 3(5) હેઠળ ગુનો દાખલ કરવામાં આવ્યો છે.
