દિલ્હીના લાલ કિલ્લા પર થયેલી હિંસા અંગે દિલ્હી પોલીસે દાખલ કરેલી ચાર્જશીટમાં કહેવામાં આવ્યું છે કે 26 જાન્યુઆરીએ ખેડૂતો લાલ કિલ્લા પર કબજો કરીને તેને નવું ધરણા સ્થળ બનાવવા માંગતા હતા. દિલ્હી પોલીસે ભૂતકાળમાં થયેલી લાલ કિલ્લા હિંસા કેસમાં ચાર્જશીટ દાખલ કરી હતી. હવે સૂત્રોના જણાવ્યા અનુસાર ચાર્જશીટમાં પોલીસે જણાવ્યું છે કે અગાઉની યોજના મુજબ મોટી સંખ્યામાં ખેડૂતો લાલ કિલ્લામાં પ્રવેશ્યા હતા અને કલાકો સુધી તેના પરિસરમાં રહ્યા હતા. ખેડૂતોએ આ કામની તારીખ ૨૬ જાન્યુઆરી પસંદ કરી હતી જેથી તેઓ વૈશ્વિક સ્તરે મોદી સરકારને બદનામ કરી શકે. પોલીસના જણાવ્યા અનુસાર હરિયાણા અને પંજાબમાંથી મોટી સંખ્યામાં ટ્રેક્ટર લાવવામાં આવ્યા હોવાથી નવેમ્બર-ડિસેમ્બરમાં જ આ યોજના બનાવવામાં આવી હતી. દિલ્હી પોલીસે ચાર્જશીટમાં તેની સાથે સંબંધિત ડેટા પણ રજૂ કર્યા છે.
પોલીસે થોડા દિવસો પહેલા 3000 પાનાની ચાર્જશીટ દાખલ કરી હતી
દિલ્હી પોલીસની ક્રાઈમ બ્રાંચે પ્રજાસત્તાક દિવસે ટ્રેક્ટર રેલી દરમિયાન લાલ કિલ્લા પર હિંસા ફેલાવવા બદલ અભિનેતા દીપ સિદ્ધુ, ઇકબાલ સિંહ, મનિન્દર મોની અને ખેમપ્રીત સહિત 16 વ્યક્તિઓ સામે તીસ હજારી કોર્ટમાં ચાર્જશીટ દાખલ કરી હતી. પોલીસે બધા પર રાજદ્રોહ, રમખાણો, હત્યાના પ્રયાસ જેવી ગંભીર કલમો લગાવી છે.
પોલીસે આ કેસમાં દીપ સિદ્ધુ અને લખ્ખા સિધાનાને લાલ કિલ્લાની હિંસાના મુખ્ય કાવતરાખોર તરીકે ઓળખી કાઢ્યા છે. તેમાં અનેક વરિષ્ઠ ખેડૂત નેતાઓના નામ પણ શામેલ છે. તિસ હજારી કોર્ટમાં ડ્યુટી મેજિસ્ટ્રેટ સમક્ષ દાખલ કરવામાં આવેલી ચાર્જશીટમાં પોલીસે દલીલ કરી છે કે આ કેસની તપાસ ચાલી રહી છે અને જો નવી હકીકતો પ્રકાશમાં આવે તો આ કેસમાં પૂરક ચાર્જશીટ પણ દાખલ થઇ શકે છે. લગભગ 3,000 પાનાંની ચાર્જશીટમાં સંબંધિત સાક્ષીઓના નિવેદનો, દસ્તાવેજો તેમજ 250 પાનામાં ઓપરેશનલ પાર્ટ્સનો સમાવેશ થાય છે.
ઓપરેશનલ ભાગમાં દર્શાવવામાં આવ્યું છે કે કેવી રીતે આખું ષડયંત્ર રચવામાં આવ્યું હતું અને અમલમાં મૂકવામાં આવ્યું હતું. આ કેસમાં લખ્ખા સિધાના સહિત અન્ય છ આરોપીઓ હજુ પણ ફરાર છે. કોર્ટ ૨૮ મેના રોજ ચાર્જશીટ પર વિચાર કરશે.
લાલ કિલ્લા પર થયેલી હિંસા પૂર્વ-આયોજિત
ચાર્જશીટમાં પોલીસે લાલ કિલ્લા પર થયેલી હિંસાને પૂર્વ આયોજિત ગણાવી હતી. પોલીસે જણાવ્યું હતું કે તપાસમાં જાણવા મળ્યું છે કે હિંસા પહેલેથી જ તૈયારી હેઠળ હતી. પ્રદર્શનકારીઓ હથિયારો સાથે ઘટના સ્થળે દોડી આવ્યા હોવાથી તેને અચાનકથી થયેલી હિંસા કહેવી ખોટી છે. તેમની પાસે તલવાર, હોકી, દંડા જેવા શસ્ત્રો હતા. તેઓએ ત્યાં ઘણી મુશ્કેલી ઉભી કરી હતી. પોલીસના જણાવ્યા અનુસાર ટ્રેક્ટર રેલીની આડમાં હિંસા કરવામાં આવી હતી.
પોલીસે ખેડૂતોને શાંતિપૂર્ણ રીતે ટ્રેક્ટર રેલીઓ યોજવાની મંજૂરી આપી હતી પરંતુ ૩૦૦ જેટલા પ્રદર્શનકારીઓ ટ્રેક્ટર સાથે મોટરસાયકલ પર ત્યાં પહોંચ્યા હતા. ત્યાં તેઓ લાલ કિલ્લામાં બળજબરીથી પ્રવેશ્યા અને રમખાણ મચાવ્યો હતો. અને પ્રદર્શનકારીઓએ લાલ કિલ્લા પર કબજો કરી લીધો હતો.
ષડયંત્ર વિના, આટલી મોટી ઘટના શક્ય નથી
ચાર્જશીટમાં દલીલ કરવામાં આવી છે કે કોઈ પણ ષડયંત્ર વિના આવું કરવું કોઈપણ સંજોગોમાં શક્ય નથી. આ કાવતરું એટલું મોટું હતું કે કોઈ અનુમાન ન લગાવી શકે કે કિસાન રેલીની આડમાં રમખાણ થશે.
