નવી દિલ્હી: દેશભરમાં હાલમાં હવામાનમાં મોટો અને વિરોધાભાસી ફેરફાર જોવા મળી રહ્યો છે. ભારતીય હવામાન વિભાગ (IMD) એ એક તરફ દેશના કેટલાક ભાગોમાં તીવ્ર ગરમી (હીટવેવ) ની ચેતવણી આપી છે, તો બીજી તરફ અનેક રાજ્યોમાં ભારે વરસાદ, વાવાઝોડા અને કરા પડવાનું એલર્ટ જારી કર્યું છે. સાયક્લોનિક સર્ક્યુલેશન (ચક્રવાતી પરિભ્રમણ) સર્જાવાને કારણે વાતાવરણમાં આ અચાનક પલટો આવ્યો છે.
આ રાજ્યોમાં ભારે વરસાદ અને વાવાઝોડાની આગાહી
દક્ષિણ, પૂર્વ અને ઉત્તરપૂર્વ ભારતમાં આગામી દિવસોમાં વરસાદ અને વાવાઝોડાની અસર સૌથી વધુ જોવા મળશે. નીચાણવાળા વિસ્તારોમાં પૂર અને પાણી ભરાઈ જવાની પણ શક્યતા છે.
- દક્ષિણ ભારત: કેરળ, તમિલનાડુ, કર્ણાટક અને લક્ષદ્વીપમાં તેજ પવન સાથે ભારે વરસાદ પડી શકે છે. કેરળના કેટલાક જિલ્લાઓમાં ભૂસ્ખલન (Landslide) નું જોખમ હોવાથી લોકોને સાવધ રહેવા જણાવાયું છે.
- પૂર્વ અને પહાડી રાજ્યો: પશ્ચિમ બંગાળ અને ઝારખંડમાં ભારે વરસાદ અને વીજળી પડવાની આશંકા છે. આ ઉપરાંત ઉત્તરાખંડના નૈનિતાલ, ઋષિકેશ અને હરિદ્વારમાં 60 થી 70 કિમીની ઝડપે પવન ફૂંકાઈ શકે છે, જ્યારે હિમાચલના શિમલા અને મનાલીમાં હળવો વરસાદ પડી શકે છે.
- ઉત્તરપૂર્વ ભારત: આસામ, મેઘાલય, અરુણાચલ પ્રદેશ, નાગાલેન્ડ, મિઝોરમ અને ત્રિપુરામાં સતત વરસાદને કારણે નદીઓનું સ્તર વધવાનું અને પહાડી વિસ્તારોમાં ભૂસ્ખલનનું જોખમ છે.
40 થી 60 કિમીની ઝડપે ફૂંકાશે પવન, પાકને નુકસાનની ભીતિ
હવામાન વિભાગના જણાવ્યા અનુસાર, દેશના અનેક ભાગોમાં 40 થી 60 કિમી પ્રતિ કલાકની ઝડપે ભારે પવન ફૂંકાશે. પશ્ચિમ બંગાળ અને ઝારખંડના કેટલાક વિસ્તારોમાં કરા પડવાની પણ શક્યતા છે, જેનાથી ઊભા પાક અને સામાન્ય જનજીવન પર માઠી અસર પડી શકે છે. તોફાનના કારણે વૃક્ષો અને વીજળીના તાર તૂટી પડવાનો ભય હોવાથી લોકોને ખુલ્લા વિસ્તારોમાં ન રહેવા સલાહ અપાઈ છે.
બીજી તરફ ઉત્તર ભારતમાં ગરમીનો પ્રકોપ: પારો 46°C ને પાર
એક તરફ જ્યાં પૂર્વ અને દક્ષિણ ભારતમાં વરસાદી માહોલ છે, ત્યાં બીજી તરફ ઉત્તર અને ઉત્તર-પશ્ચિમ ભારતમાં સૂર્યદેવ આકરા પાણીએ છે.
- દિલ્હી-NCR: દિલ્હી, હરિયાણા અને પંજાબમાં ગરમીનું મોજું (Heatwave) ફરી વળ્યું છે. દિલ્હીમાં તાપમાન 43 થી 45 ડિગ્રી સેલ્સિયસ સુધી પહોંચવાની સંભાવના છે.
- ઉત્તર પ્રદેશ અને રાજસ્થાન: ઉત્તર પ્રદેશના કેટલાક જિલ્લાઓમાં પારો 46 ડિગ્રી સેલ્સિયસને પાર પહોંચી ગયો છે. રાજસ્થાન અને મધ્યપ્રદેશમાં પણ ગરમ લૂ ફૂંકાઈ રહી છે.
- હવામાન વિભાગની અપીલ: આગામી થોડા દિવસોમાં ઉત્તર ભારતમાં ગરમી હજુ પણ વધી શકે છે, જેથી લોકોએ બપોરના સમયે બિનજરૂરી બહાર નીકળવાનું ટાળવું અને સાવચેતી રાખવી જરૂરી છે. જોકે, વરસાદવાળા રાજ્યોમાં તાપમાનમાં 1 થી 2 ડિગ્રીનો ઘટાડો નોંધાઈ શકે છે.
