બીસીસીઆઇએ આઇસીસીને સત્તાવાર રીતે ભલે કહ્યું ન હોય કે અમે સંયુક્ત અરબ અમીરાત (યુએઈ)માં વર્લ્ડ કપ યોજીશું, પરંતુ આઇસીસીના અધિકારીઓ અને બીસીસીઆઇના અધિકારીઓ વચ્ચે રવિવારે ત્યાં ટી-20 વર્લ્ડ કપ યોજવા માટે બેઠક યોજાઈ હતી.ઉલ્લેખનીય છે કે એવી ચર્ચા થઇ રહી હતી કે ટી-૨૦ વર્લ્ડ કપ હવે ભારતમાં નહીં પરંતુ યુએઈમાં યોજાશે હવે આ કાર્યક્રમની તૈયારીઓ શરૂ થઈ ગઈ છે.
બીસીસીઆઈના એક અધિકારીએ જણાવ્યું કે બીસીસીઆઈ અધ્યક્ષ સૌરવ ગાંગુલી, ઉપાધ્યક્ષ રાજીવ શુક્લા, ખજાનચી અરુણ કુમાર ધૂમલ અને આઇસીસીના ટોચના અધિકારીઓએ રવિવારે દુબઈમાં બેઠક યોજી હતી. બીસીસીઆઈના સચિવ જય શાહ શનિવારે ભારત પરત ફર્યા હતા અને વીડિયો કોન્ફરન્સિંગ મારફતે બેઠકમાં ભાગ લીધો હતો.
હોટલ બુક કરવાની પણ ચર્ચા હતી
બીસીસીઆઈએ શનિવારે અમીરાત ક્રિકેટ બોર્ડ સાથે બેઠક કરી હતી અને હવે રવિવારે આઇસીસી સાથે બેઠક યોજી હતી. બીસીસીઆઈના અધિકારીએ વધુમાં જણાવ્યું હતું કે, આ બેઠકમાં હોટલોના બુકિંગ અંગે પણ ચર્ચા કરવામાં આવી હતી કારણ કે તે જ સમયે દુબઈ એક્સ્પો (આ વર્ષે 1 ઓક્ટોબરથી આવતા વર્ષે 31 માર્ચ સુધી) યોજાવાનો છે જેમાં વિશ્વભરના લોકો આવશે. આઇસીસી અને બીસીસીઆઈ સમક્ષ સૌથી મોટો પડકાર ૧૬ ટીમો માટે હોટલબુકીંગનો હશે.
આ મુદ્દાઓ પર ચર્ચા કરવામાં આવી હતી
આઇપીએલની બાકીની સિઝન સપ્ટેમ્બર-ઓક્ટોબરમાં યુએઈમાં રમાશે તેવું જાણવા મળ્યું છે. બીસીસીઆઇના અધિકારીએ વધુમાં જણાવ્યું હતું કે, આ બેઠકમાં આઇપીએલ બાદ તરત જ ટી-20 વર્લ્ડ કપ કેવી રીતે શરૂ થશે, તેના માટે પીચો કેવી રીતે તૈયાર કરવામાં આવશે અને દરેક મેદાન પર કેટલી પીચો તૈયાર કરવામાં આવશે તે અંગે પણ ચર્ચા કરવામાં આવી હતી. જો પ્રેક્ષકો આવે કે ન આવે તો કેવા પ્રકારનો પ્લાન હશે? આ બંને મુદ્દાઓ પર પણ ચર્ચા કરવામાં આવી હતી.
બાયો-બબલ પર સૌથી લાંબી ચર્ચા ચાલી
આ ઉપરાંત બાયો-બબલ (કોરોનાને રોકવા માટે સલામત વાતાવરણ) પર સૌથી લાંબી ચર્ચામાં બાયો-બબલ કેવી રીતે કરવું તેના પર ભાર મૂકવામાં આવ્યો હતો, જેથી કોરોના ચેપનો એક પણ કેસ ન નોંધાય. વળી, તેમાં કઈ કંપનીને સામેલ કરવી જોઈએ? તેની પણ ચર્ચા થઇ. બેઠક દરમિયાન એક ઉદાહરણ એ પણ ટાંકવામાં આવ્યું હતું કે યુએઈમાં છેલ્લે જ્યારે આઇપીએલ યોજાઈ હતી ત્યારે બાયો-બબલએ ખૂબ સારું કામ કર્યું હતું.
ઓમાનમાં ક્વોલિફાયર મેચો યોજવાની પણ ચર્ચા થઇ હતી
આ ઉપરાંત ઓમાનમાં ક્વોલિફાયર યોજવાની જરૂરિયાત અંગે પણ ચર્ચા કરવામાં આવી હતી. જોકે હવે યુએઈ સરકાર સાથે તેની ચર્ચા કરવી પડશે, કારણ કે જો આપણે ઓમાનમાં ક્વોલિફાયર કરાવીએ અને ક્વોલિફાય થનારી બે ટીમો આવે, જો યુએઈ સરકાર તેમને 15 દિવસના ક્વોરેન્ટાઇન પર મોકલશે તો આખો વર્લ્ડ કપ જોખમમાં મુકાઈ જશે. આ માટે આઇસીસી અને બીસીસીઆઇ હવે યુએઈ સરકાર પાસેથી તે ટીમોને ઓમાનના બાયો-બબલમાંથી સીધા યુએઈબાયો-બબલમાં મુક્તિ આપવાની પરવાનગી માંગશે જેથી તેમને ક્વોરેન્ટાઇન કરવાની જરૂર નહિ રહે. જો યુએઈ સરકાર સંમત થશે તો જ ઓમાનમાં ક્વોલિફાઇંગ મેચો યોજાશે, નહીં તો બીજો માર્ગ શોધવો પડશે.
